Ji bo hunermendê şêwekar Xelîl Ebdulqadir

Rengên te di tabloyê de ....berfereh dibin û sînorê Dîmenê dibezînin.
rengên te li der dora asoyê dijîn .
rengên te ji rengê keskesorê zengîntir dibin, û di heman çarçewê de
distirînin.
di heman
demê de...pêrgî umîdê dibin.

rengên te....tevlî hev sipî dibin.
û gava ji hev vedqetin reş dibin.

rengên tu bikar tînî....di rastiya xwe de pêlek ji derya jiyan û mirina te
ne, ango
dîloka jiyanê bi darvedikin û çîroka mirinê bi niqtepirsê bi dawî tînin.

di kakilkê her rengekî de, sed rengên çalak-qeşeng û bedew têne afirandin.
di tevlî heva rengên her tabloyekê de û bi awayekî berfereh....
jiyan...êş...kovan....mirin
jiyan...şad...xweşî...jidaykbûn
têne diyarkirin.

ji sebeta tabloyên piçûk ber bi dergehên jiyan û mirina gewre ve em tên.

ji rengên te, û bitaybetî rengê şîn...(şînê te ) ê sar û qeşa girtî ,
bîna rewrewk û xewnan tê
ji rengê te yê şîn, em rasta şînê helbesta MEHA BEKIR tên,
belko ...evî şînî hûn gihandin hev...?

*

JI nerînên melûl (ên jinên di tabloyên te de) bîna şikestinê difûre.
Gelo li rojhilata navîn ...çendîn jin têne xapandin....?
çendîn perwanên şox û şeng têne
perçiqandin...?.
çendîn kulîlkên nuh bişkivî têne
qurmiçandin....?
çendîn xewn têne serjêkirin....?

çavên jinên di tabloyên te de, timî şil in
piştî tu Tabloyê bi dawî tînî ew hîn digirîn..ew hîn fermêskan dibarînin
lê girî ..qet xweşewîstê wan venagerîne
qet derdê dilan kêm nake.
lê ew ji neçarî her sirûda giriyê xwe berdewam dikin ta ku çavên me jî bi
girî vedibe.
ji tevgera ewan jinan
dengê bêrîvanan
sirûdên palevanan
sitranê li ber Destarî
dîlokên xêl û berbûlî
û şeva hinê ........qet nayê
tenê sitranên şînê , di guhê me de vedijin...ta radeya ku ew jin xelatên girî
û şînê werbigrin.

bê guman ji erxewanên hinarkên ewan jinan berî mirina rojane
bîna Anahîtayê dihat.
MIZGÎN MEHMÛD
24.02.2007