Doh 17. 03. 2007, demjimêr 13.00

Li Sandvikenê pêşengeha Şêwekar Mehmûd Hiso vebû

Swêd. Sandviken. rojava.net. tirej: Doh 17. 03. 2007, demjimêr 13.00 li bajarê Sandvikena Swêdê, berpirsê Hola Hunerê li bajarê Sandivikenê Lars Wesleman pêşengeha hunermendê şêwekarê Kurd Mehmûd Hiso vekir.

piştî ku Lars wesleman hestên xwe derbarê pêşengehê derbirîn û kêfxweşiya xwe eşkere kir, doz li berpirsa çand û hunerê ya bajarê Sandvikenê kir ku derbarê ezmûna Mehmûd bîrûboçûnên xwe bibêje.

Berpirsa Çand û Hunerê Åsa Wirén Jonsson bi şêwazekî rexnekariyane derbarê tabloyan peyivî û di serencamê de bal kişand ser şêwaz û naverok û teknîka bikaranîna rengan û xwe pir bextewer dît ku ev pêşengeh li bajarê wê li dar dikeve.

Piştî wê, ji alî Kurdan ve jî Buhar Elî Bekir gotinek derberê ezmûna Mehmûd Hiso pêşkêş kir û bandora êşa kurdan û trajediya wan di tabloyan de ragihand, herwisa ezmûna hunerî ya M. Hiso wek ezmûneke nûjen û serkeftî li qelem da.

piştî gotinan û pêşkêşkirinê, kemanjenê kurd Stêr Kurdaxî bi hin parçeyên mûzîkê beşdar bû û seqaya Holê berbi peywendiya di navbera rengan û ahengê û afirandinê de anî bîra xelkê.

Hêjayî gotinê ye ku jimarek e pir mezin ji hunermend û siyasetmedar û rojnamevan û rewşenbîrên swêdiyan îro li pêşengehê amade bûn û di gelek rojnameyan de der barê pêşengehê hate nivîsandin.

Her wisa, li gorî agahiyan, Carin Nilsson û Lars Nilson ji partiya Çep a Swêdê, Zagrosê Hajo berpirsê gişti yê Kovara Urkêş û hin endamên komeleya Kurdên Sandvikenê jî, li pêşengehê amade bûn.

Ev pêşengeha Memûd Hiso bi alîkariya welatparêzê kurd Zerdeşt Bekir li KONSTHALLEN a Sandvikenê hate li darxistin.

pêşengeha Mehmûd Hiso hetanî 15ê Nîsanê domdike.

Linkên Swêdî

Linkên Swêdî2

Link Fransî