Siyamed Sîpan Uğurlu

Ey Azadî

Siyamed Sîpan Uğurlu


Tu nizanî
Bê ev çend şevreşa
Li benda te mam

Di şevên reş û tarî
Ba û baran de
Ez li bendê bûm
Ku tu werî li deriyê min bixî
Ey Azadî


Te girtin ji destê min
Ey Azadî
Bi zorê te girtin
Ji himêza min
Bi zore te derxist
Ji xewnên zaroktiya min
Di dergûşa te de
Hînê dengê lorandinên min tê
Û bêhna kenê te
Hîn jî tê ji cilên min
Ji xwe bêhna hezkirina te
Xwe li ser dilê min kiriye neqş
Û qet ji dilê min nare
Ey Azadî


Tu bi xwe zanî
Bê te jiyan tev girî ye
Hemû jî êş û zorî ye
Bê te jiyan koletî ye
Ey Azadî


Di nav dîwarên zilmê de
Dixwestin te bieciqandana
Ey Azadî

Dixwestin li du xwe bihêlin
Şevên sar û dirêj
Berf û baran mij û dûman
Ey Azadî


Kes bi qasî me
Xatirê te nizane
Û kes bi qasî me
Ji te heznake û bêriya te nekiriye
Ey Azadî


Ji ber ku tu ji
Dergûşa me hatiyî revandin
Ey Azadî
Mîna Roja Me.