|
27 Pûsper 2007
HEWLÊR - Mîhrîcana Cegerxwîn bi
çalakiyên cur bi cur li Hewlêrê tê
lidarxistin. Endamê Komîteya
Amadekar a Mîhrîcana Cegerxwîn Azad
Dartaş ragihand ku Mîhrîcana
Cegerxwîn îsal di 20’ê rezberê de dê
pêk bê. Roja dîroka mîhrîcanê roja
koçkirina dawî ya helbestkarê kurd
Cegerxwîn e ku ew di roja 22’yê
rezbera 1984’an çûbû ser dilovaniya
xwe ye.
Mîhrîcana Cegerxwîn îsal li Hewlêrê
di 20’ê rezberê de dê bê lidarxistin.
Di mîhrîcanê de dê çend lêkolîn û
çalakiyên cur bi cur bên kirin. Hate
ragihandin ku li ser hev ji bo
mîhrîcanê 600 milyon dînar hatiye
vederkirin.
PEYKEREK AMADE KIRINE
Endamê Komîteya Amadekar a Mîhrîcana
Cegerxwîn Azad Dartaş, destnîşan kir
ku îhtîmal heye ku lêçûn zêdetir jî
lê biçe. Dartaş, diyar kir ku
mêvanên mîhrîcanê dê ji her çar
parçeyên Kurdistanê û Ewropayê bên.
Beşeke mîhrîcanê dê taybet be, bi
van lêkolînên ku ji bal komîsyoneke
pisporan tên hilsengandin, piştî ku
mîhrîcan bi dawî bû dê bibe pirtûk.
Her wiha peykerekî Cegerxwîn ji bo
mîhrîcanê ji aliyê peykersaz Hadî
Ziyaeddîn ve tê amadekirin. Dartaş,
diyar kir ku niha problemek wan a
anîna peyker heye.
PIRTÛK TÊN BELAVKIRIN
Her wiha hate ragihandin ku fîlmekî
dokumenter jî li ser jiyan û
berhemên Cegerxwîn di mîhrîcanê de
bê nîşandan. Pirtûkeke Cegerxwîn ya
ji 700 rûpelî ku ji helbest û
berhemên wî yên hilbijartî ku pêk
tên, tê çapkirin û di dema mîhrîcanê
de dê bê belavkirin. Hin pirtûkên
din jî li weşanxaneyên bakurê
Kurdistanê tên çapkirin û di
mîhrîcanê de dê bên belavkirin.
KONSEREKE MEZIN
Dartaş, diyar kir ku di mîhrîcanê de
dê konsereke sirûdên neteweyî jî ji
bal wan hunermendan bê sazkirin ku
helbestên Cegerxwîn kirine sirûd û
stran. Bi vê mebestê jî Şivan Perwer,
Gulistan, Şîrîn Perwer, Ciwan Haco û
hin hunermendên din ji bo wê konserê
hatine bangkirin. Tê ragihandin ku
îhtîmal heye ku ew 600 milyon
dînarên ku ji bo mîhrîcanê hatine
vederkirin têrî nekin û ji hikûmetê
daxwaza budçeyeke zêdetir bê kirin.
Çavkanî:
www.azadiyawelat.com
|
