Baskên şikestî li ber bê dihejîn.
Tîpên bêrîkirinê li ber bayê aso
dilerizîn.
Belgeyan, rûkê dîtinê şîn kirin.
ev volkan bêhûde ye.
Li me kiriye perda xeman.
Stêrkên hêvîdar, esîman wenda nakin.
Mirin, bêdeng diherike...
Û ev dil nakeve ber hişmendiya wê.
Êdî bihna asîman û buhara hêviyan,
keştiya pêşeroja min digerîne.
Hîna ev can e...
Canek e li binê oqyanosan li masiyê
xwe digere.
Giyanê, ez fêrî Jiyana li nav
bedewiya zinarên ku dikenin, kirime.
Û girnijîn, ji navika çiya dizê.
Êdî hemû dîmenên van xirbeyan...
Derdên min dikewînin.
Wiha kiriye, ku xudawend jî,
matmayî û lal man.
Katjimêrên avê, sar û gerim
ditevizin.
Û hevrikiyên tiblên ewar in.
Pala xwe didin bêrîkirinên xembar.
Nema guh didim efsaneyên derewîn.
Her deng, nema bi kêrî çolên dilê
min tên.
Min bi dilopên xuhdana aniya xwe,
gul şîn kirine.
Navê wê, çola qêrînê ye.
Ma bîrhatin, mirovan ji bîr dikin?.
Ew dara fêr bibû navê tîpên me, ji
bîr nake...
Û dilê xudawendê hêviyan bihêle...?.
Tenê ez û tu tawanbar in.
Lewra ax ne kavilên xav in.
Ne kundên bêçav in.
Ev şev, bendewarên çi ne...?!.
ew hest ji gerê qerimîne.
Mîna hejariya keziyên payîzê…
Darên qaçê hejar bûne.
ji wê xwenê ...
Di wê romana nenivîsî de...
Tu xewna çenda yî...?!.
Tu çavên çenda yî, ku dê di
hevdîtina dawî de xwe bikûjin...?!.
Tu yê çemê çendîn bî...
bêyî ku biherikî, tu yê bimiçiqî...?!.
Barê pirsa giran î.
Di şevên zivistanê de...
Tîna agir jî gerim nake dêliyên
tiriyan.
Û xweşik nake bejna çinarê.
Va ye, sekeratên hinaseyên xwe
dijmêrim.
Va ye, vegerim rojên dawî yên jîna
xwe.
Sebir û aramiya Eyûb jî westiyaye.
Û gewriyên çûkan awazan dicûn.
Teyr û firnde, nema tên dîtin
Û hêlînên xwe, nav beştên xaniyên
axê de nema çêdikin.
War û şûnwar bi tenê mane.
Tenê sîpelkên gilolîka berfa reş...
Hêêdî.....hêêdî dihelin.
Û li paş xwe pişkujên vîna xwe
dihelînin.
Min tenê xewna pêncê ji kirasê şevê
re hiştiye.
Nizanim, ji strana saza te re, ez ê
aşûpa çendan bim...?!.
ji avjeniya evîna te re, ez ê zeriya
çendê bim...?!.
Nizanim .....
nizanim...
Çiyayên Qendîlê
15/6/2007
nergizismayil@hotmail.com
|
