| |
Kawa Şêxê
Nameyek ji Dayika Min Re
Roj baş Dayê!
Ev bû çend roj ji te pêve di Bîra min de nayê
ka ji min re bibêje, te vê sibê qehwa xwe vexwar û te ya
bave min dayê
an jî wek her sibehê, hê tu li hêviya min î?
ez ji Berlîn, ji te re dinvîsim û malşewitiya Berlînê
dayê bêdawî ye..
Bi Mîlyonan dayê tê de hene..
lê hîn kesî ji bo min negotiye tu kî yî?
kesî negotiye min tu birçî yan jî tî yî?
Hîna Jinekê dest porê min nedaye û negotiye: Kurê min te
çima xwêdan daye?
û hîna Jinekê Kewê tî di sînga min de av nedaye..
û hîna Jinekê ji min re negotiye: Şev sar e Kurê min, tu
li ku mayî?
Roj baş daye û roj bi te dest pê dike....
Tu bi destekî nan ji min re li penêr dipêçî û min bi
maçekê li ser riya dibistanê bi rê dikî
û bi destê din jî dîwarên hêviyê li dora min lê dikî
Roj baş dayê û ez dizanim ku tu hîna di pencerê de li
hêvya min dimînî
û ez dizanim ku tu her şev min di xewna xwe de dibînî
û ez dizanim ku tu di nava Kulîlkên - te ew li bexçe
çandine- diçînî
ez zanim tu her êvar, li ber rojavahiyê, min weke ayetê
dixwînî
û her Sibeh wek xunav dişînî
ka ji min re bibêje, te û salan, we çi ji hev kir?
hîna keryên xezalan ji çavên te dadikevin bi rev?
û hîna tu qûçan radikî û dîsa wan her şev dihilşînî?
ji min re bibêje !
hîna tu kulîlkên pencerê bi çemê Hêviyê av didî?
û her êvar berî tu razê silavê li wêneya min dikî?
Hîna tu nahêlî kes li cihê min rûne?
û hîna tu gurzên qawana li dora sûretê min dihûnî?
û her sibeh tu radibî ku va ye hemû kulîlkên dunyayê li
ber Serê te vebûne?
Roj baş dayê !
ez aniha dizanim bê min çiqasî bêrya te kiriye
min bêrya bêhna destê te kiriye
min bêriya biskê sipî ji porê te kiriye
û min bêriya rengê hinê li ser serê tilyên te kiriye
Roj baş dayê !
Roj baş melayiketa vê dunyayê
Roj baş nazika rengê xwezayê !
Roj baş hêviya dawî ya ku di taryê de vêketî mayê
diyariya asman û Xwedayê
ez dizanim ku em li ber çavê te mezin nabin
ez dizanim ku tu dua dikî da em şa bin
ez ê çawa bikenim heger çavên te ji bo min giriya bin?
û ez e çawa zanibim ku Roj hilatiye bê ku perwanên te li
dora min firiya bin?
Roj baş dayê û ez dizanim ku tu bi Nameya mirinê hêsiran
dibarînî
bibûre ...ez dizanim ku Zarokekî sîh û pênc salî şerm e
ku dayike xwe bigirînî.
Kawa şêxê
Vlotho
21.06.2006
Tîrêja Kurdî
kurdi@tirej.net |
|
